Færeyingur gerist sekur um kristni

by eiduralfredsson

Ég skil ekki hvað menn eru hissa yfir því að Jenis av Rana er í nöp við lesbíur. Maðurinn er bara kristinn. Eins og hann segir sjálfur: “hetta signalerar ikki tað normala sambært skriftunum”.

Þetta er mjög skýrt í báðum Testamentunum: samkynhneigð er óeðlileg.

Í Þriðju Bók Móse segir:

Eigi skalt þú leggjast með karlmanni sem kona væri. Það er viðurstyggð.

Í Bréfi Páls til Rómverja segir:

Þess vegna hefur Guð ofurselt þá svívirðilegum girndum. Bæði hafa konur breytt eðlilegum mökum í óeðlileg, og eins hafa líka karlar hætt eðlilegum mökum við konur og brunnið í losta hver til annars, karlmenn frömdu skömm með karlmönnum og tóku út á sjálfum sér makleg málagjöld villu sinnar.

Í Fyrra Bréfi Páls til Korintumanna segir:

Vitið þér ekki, að ranglátir munu ekki Guðs ríki erfa? Villist ekki! Hvorki munu saurlífismenn né skurðgoðadýrkendur, hórkarlar né kynvillingar, þjófar né ásælnir, drykkjumenn, lastmálir né ræningjar Guðs ríki erfa. Og þetta voruð þér, sumir yðar. En þér létuð laugast, þér eruð helgaðir, þér eruð réttlættir fyrir nafn Drottins Jesú Krists og fyrir anda vors Guðs.

Semsagt, hommar og lesbíur eiga séns að komast í ríki guðs, en einungis ef þeir láta af villunni.

Þeir sem vilja vera kristnir og ekki hræsnarar um leið, verða að sætta sig við þetta. Samkynhneigðir verða líka að átta sig á því að kristnin er stysta leiðin til helvítis.

Advertisements